Wednesday 5 March 2008

帶病復工後的戰利品

月頭,剛出了糧身痕,勁想買野,不過因為腸胃炎,整個weekend呆在家中訓訓訓著養病,咩都無做..T_T...今日復工後回家前忍唔住去左信和掃貨。以下的4隻是在「鋪頭仔」買既,不過漏買了電影《JUNO》的soundtrack....>_<...我唔制!明天即刻去補買! 臨訓前聽唔晒8隻咁多,選了幾隻最想聽既。 《There Will Be Blood》soundtrack,主要因為我鐘意呢套戲,佢既音樂同樣好聽,同時帶我回到戲院再看一次,不過今次係簡短既精華版。^_^

今次Baubaus既新碟除左得個鬼影就乜都無,d字用晒spot UV黎做,真夠minimal。未聽,留後。\(好緊張好緊張好想聽^O^)/

呢隻《LUST  LUST LUST》我係唔識既,係「鋪頭仔」老闆介紹,我本黎諗住唔買架啦點知...
老闆話:唔買唔緊要喎,我化晒架啦,無所謂喎,你話事啦。
我選好左手上既3隻之後,見到門口有隻女人頭既CD,同時仲有2個潮男入黎各買1隻。因為咁我有小小好奇,
我問老闆:呢隻咩黎?好好聽架?
老闆:你入黎時咪播過羅。
我:咁係咩黎架?
老闆:咪個d個樣後生,但係把聲聽落唔似,都幾好既,你睇下門口既簡介有寫。
我:不如你播多次黎聽下啦。
老闆:嗱,呢樣我就有所謂啦,講真呢隻野我賺得唔多,唔想為佢做咁多野,你明唔明呀,賺得個幾蚊...
我:咁算啦,橫店我都係想買4隻咁要埋呢隻《LUST LUST LUST》
老闆:唔好,咁你選個隻女人頭羅,呢隻係ok架,你可能會鐘意多d架喎...
我:算啦,係pop d既好快膩,試下新野羅。
其實後尾老闆都有小小唔好意思,不過我其實唔係想同佢作對或者留難佢之類,我真係諗住試下新野,咁買完我就走,咁就忘記左我好想要既《JUNO》soundtrack,鳴...T_T...
諗起黎每個人係唔同時門有唔同堅持,老闆講得出「我化架啦」其實都唔係太化 ^_^ 佢始終係「有所謂」既,咁都幾好呀。為左幾蚊都幾可愛。唔知第時我會唔會都係咁呢。

買左返黎拆開呢隻《LUST LUST LUST》時發現裡面送紅藍立體眼鏡,用黎望番個CD盒d字突出來,連入面既相都係有立體感既,幾好玩,就算未聽都已經勁鐘意呢隻CD了。\([*]-[*])/
《Ma Fleur》都係老闆介紹,佢話係佢鐘意既野喎,咁試聽左另一隻都覺得幾好,係d灰灰沉沉既 acid jass做底加上好多唔同樂器既變化,都幾多元化咁。未聽呀,灰野留後聽。


以下4隻是在Zoo買的,全部我都有試聽過除左 Thee Silver Mt. Zion。
因為我係Silver Mt. Zion既fans,(應該係)儲齊佢地既所有ablum,F係電話話佢地改左個名出左新碟,於是我問一問,原來佢地係加左個字叫Thee Silver Mt. Zion,(車,忍唔住想話佢地無鬼聊,加個Thee字)新碟《13 BLUE FOR THIRTEEN MOONS》,都係未聽,不過佢地隻碟好靚呀!這時諗起我預科時第一次看林奕華既小小說《太多男人,太小時間》,第一次係腦裡想像男仔吻落男仔度,第一次知道法斯賓達既《十三個月亮》這套戲,今天我還未有機會看過。
呢隻新試既野,《I CAN HEAR YOUR HEAT》都係因為個咸咸濕既線畫封面和裡面扮故事書既內頁,令我好想買。聽完《There Will Be Blood》時聽佢,男聲係度講故仔,古靈精怪咁幾得意,希望我唔多聽多幾次就覺得唔鐘意啦!
《the ghost that carried us away》又係試新野,不過都係唔算咩新野啦,都係inde alternative既野,我鐘意樂器既為主個類羅。未聽呀,又係見佢咁靚,買左返黎先算啦!

其實我心裡一直一直超記卦住搵唔到既J.S.Bach低音大提琴獨奏組曲既雙CD放鬼左去邊...T_T...以前ipod未壞時佢長期save係度,就算唔係想聽,放係度都好安心,而家換左用手機聽歌後找唔番隻CD入歌,覺得成個電話歌曲既collection無晒意思...>_<...Bach 點解我咁鐘意你呀,我會快d去HMV classical個邊比錢架啦! 《Hurtbreak Wonderland》呢隻CD係Zoo入面見到時覺得熟面口,到底我係邊度見過佢呢?阿麥書房?雜誌?音樂介紹?全無印象但卻覺得好好好好面善,於是黎手買左佢。臨訓前聽埋呢隻《Hurtbreak Wonderland》佢帶著小小古典既味道,頂一頂我卦住Bach既低音大提琴既癮,令我安心小小去訓個覺。