一條街的生老病死

[字幕開始]
係香港，我住過廿幾個地方，包括：銅鑼灣、九龍塘、九龍城、屯門、青龍頭、天水圍、大埔、天后、秀茂萍、西環、錦田、官塘、側魚涌、青衣、西沙、樂華邨、油麻地、荃灣、薄傅林、香港仔。

住得最開心既係第一次同朋友夾租，九龍城唐樓，二房一廳，地方大，樓下有小巴24小時直達旺角。

不過就算唔出去，留係度，樓下同一條街，由街頭開始數：超級市場、老人院、診所、舊式快餐店、髮型屋、美容院、腳底按摩、畫室、時裝店、7仔　同埋　生果舖，對面街就係：車房、西餐廳、洗衣店，行過小小就係獸醫診所，一條街已經集合咗生老病死，唔介意悶嘅話，可以「吽」係條街一世唔出去。不過最近返去，乜都唔同晒，有一半嘅物業已經比田生收購咗。

細個住屋村，嗰時無諗住嘅地方係大係細，只要有得去公園玩，有得去街市食涼粉，有得去樓下街坊開嘅士多玩麻雀，攞叔叔五毫子買糖，彈下橡筋，咁又一日。

後來我先知自己屋企算窮，阿媽話我4歲之前都無雞脾食，不過我覺得生日有香橙蛋糕已經好幸福，反正我只係鐘意食雞皮。

好憎半年前政府賣嘅一個平面廣告「無論生活幾艱難，我地都要捱落去」，點知最近上小巴，收音機仲播緊呢個宣傳聲帶，真係聽到好火滾！

我覺得無論居住環境係點，生活係點，窮呢個概念往往係過之後先至明白，窮唔等於不快樂，唔等於好慘，亦不等於可以叫任何人捱落去。

政府盈餘幾千億，知啲人捱得辛苦，又唔做啲野！咁咩意思先！

又加租啦，我又要搬屋。[字幕結束]