by Grace
【赤裸相對時】那一天，他們在新界荒野進行天體攝影……
Simon C 攝影作品「大地」
走進粉紅色的展場，一幅兩米的相片懸垂眼前。這是一張黑白相，相中人全部背著鏡頭。從頭髮到足踝，他們一絲不掛，在草地上奔跑。有動有靜。另一張黑白照，相中只有一個人，裸裎著身體，安躺於草叢，蜷曲猶如嬰孩。
「這些相片都在香港拍嗎？」記者問。
「是的，在新界一處荒野。」
推動身體自主的藝術家小丁和彭靖，與攝影師 Simon C 合作，廣邀身邊朋友去年共同進行天體攝影項目，以自然的身體融入自然的土地。作品雖然投報日本越後妻有大地藝術祭不果，但無損他們之間的合作，更希望有天能夠輯錄成書，部分相片近日在「體祭」展覽中得以展示人前（富德樓的展覽已經完結，將於本星期日起移師黃竹坑繼續舉行，須預約參觀）。
「原來我身材無想像中咁差」
「記得嗰日好熱，就喺八號風球之前...」其中一名參與的模特兒阿敏說。
連同攝影師 Simon C，一行十二人，分擔各種攝影器材，走了 45 分鐘山路，來到一片大草地。行山行到汗流浹背，大夥人到達拍攝地點時，想也沒想就各自褪去身上衣物。曾參與天體活動的 Gary 笑言，是次拍攝遇到認識的人，沒料到對方對天體有興趣，「尷尬在於，有啲出乎預期，令我唔知點面對。」小丁解釋，在熟悉的人面前裸裎身體，反而比面對陌生人更難，「因為大家已經有一定嘅角色位置，所以唔知道對方有幾接受到裸體，甚至唔知道下次見面要點延續，大家嘅關係要重新適應。」
讓 Gary 出乎預料的參加者是 Meili，二人相識於工作上的合作。今次是她第一次正式參與天體攝影，她幽幽地說：「其實我都未有心理準備㗎」。她憂慮的並非熟人的眼光，而是身材，也是之前不愉快的拍攝經歷，「上次影得我好肥，我好不開心」。那次事前未有說明要赤裸身體，拍攝期間卻在攝影師引導下「愈剝愈多」，她皺皺眉頭道：「重點係影得我好肥！如果你事前講，我可以 keep fit 嘛。」
「之前我會成日覺得，我個胸咁細，個肚腩又咁大，點影唔著衫嘅相呀？」Meili 希望突破自己，而且相信小丁的安排妥善，所以參與是次天體攝影活動。拍攝當日，眼見各人「好自然咁除」，一絲不掛地走來走去，她說：「大家都光脫脫咁，我覺得：咦？原來我身材都無我想像中咁差啫？」
「體祭2018」海報（背景相片，攝：Simon C）
「唔好先 judge 對與錯」
是次拍攝過程，攝影師沒有要求模特兒擺出甚麼「pose」，大家繼續在草原上「生活」，差異只在於彼此身上有沒有衣服。參加者覺得當日活動有如「旅行」，各人如常聊天、吸煙、selfie，甚至赤裸全身幫忙搬運器材。草地雖然偶有行山人士，或者爬山單車經過，但如 Gary 所說：「喺嗰個環境下，我哋反而變咗大眾，小丁當時仲全裸咁向管理員問路添！」
提起管理員，大家牽起一陣騷動，阿敏拍打地板，道：「最後嗰個管理員仲同我哋...」另一名參加者華仔續道：「好奇怪呀佢」。他形容，那名男管理員起初「私私縮縮」，但其實「慢慢漸進」。大夥人一度邀請管理員拍攝「集體相」，但對方回應「唔敢埋嚟影」，解釋道：「咁多女仔唔著衫，驚會有生理反應」。華仔停頓一下，再說：「其實佢當時已經有反應，後來佢自己攞埋（陽具）出嚟，差不多自瀆咁」。
「唔好去 judge 佢對與錯先！」從人體寫生模特兒開始接觸天體活動的 Jimmy 忍不住插嘴。他嘗試代入管理員的角色，想像在平日工作的場所見到一群裸體的人。自瀆作為回應，可能「自私」，但他認為不失是「以佢諗到嘅形式加入、參與我哋」。身為主持人，小丁坦言知道阿敏和華仔認為管理員的做法「無禮貌」，但她與 Jimmy 的想法相近，態度較為體諒。
「喺大家日常壓抑嘅生活入面，一班人裸體嘅情景，只會喺鹹片先會出現。無諗過呢啲事會真實咁發生，更加無諗過要點去面對。」小丁認為，裸體視為社會禁忌，公眾對開放身體並不認知，才會感到好奇興奮，「如果我哋唔去改變呢種觀念，日後進行天體活動只會遇到更多『管理員』。」
小丁補充，野外場所既然是共同的空間，所有使用者都要互相尊重，應該要基於「互不打搞」的原則行事，說：「所以我唔係鼓勵大家鍾意喺邊度裸體就裸體呀！」
「體祭2018」海報（背景相片，攝：Simon C）
「我只係做返自己」
「社會有秩序嘅，但衣服只係工具。」Gary 強調，即使自己享受天體，但總不會貿貿然裸體走到街上。他認為，衣飾充滿價值判斷，用作與他人的識別。以古典奧運會為例，運動員都全裸作賽，也追求平等的象徵。以用餐方法為喻，他說：「正如我哋用筷子食飯，都唔會彈人哋用刀叉，或者直接用手食飯啦」。Jimmy 表示同意，並指人類群體生活，需要考慮不同價值取態，所以用衣服包裹身體是「方便啲」的安排，但認為應該保留「赤裸」的選項，道：「身體係與生俱來嘅，點解要去收埋呢？」
「裸體係一件好自然嘅事，我都希望有一日裸體唔再係話題，亦唔洗再用藝術包裝。」小丁如是說。裸與不裸，中間似是有無數心理關卡尚待衝破；穿與不穿，選擇像是背負了種種旁人目光和內心掙扎。「唔著衫，醜死怪！」由細聽到大的一句，潛移默化，形成自我規範身體的枷鎖。
「你係咪想睇女仔呀？」參與天體攝影的男模特兒時常聽到這些調侃。
「你會唔會蝕底㗎？」女模特兒也不時聽到這樣的告誡。
從一群參與天體攝影的模特兒中，尋找那赤裸的理由，原來可以如此赤裸，如阿敏所言：「我覺得只係做返自己呀」。打開身體，是對自己的坦誠，是對自己的接納。說話可以修飾，但身體總是純粹直接，而且承載著那個人的種種經歷。赤裸不是猥瑣事，而是生活方法的選擇。即使小眾，仍然值得尊重。一場攝影行動，乃至之後的「體祭」展覽，用來推動身體自主，她認為「其實不只係我哋點睇身體，更加係我哋點睇自己」。
「體祭2018」海報（背景相片，攝：Simon C）
